بشارة الفرح العظيم

إيه اللي يسوع عايزه في عيد الميلاد ده؟

أوقات بنسمع الناس بتقول إن ربنا خلق الإنسان لأنه كان وحيد، وبالتالي بيقولوا: «الله خلقنا علشان نكون معاه». هل يسوع يتفق مع الكلام ده؟ هو فعلًا بيقول إنه حقيقي عايزنا نكون معاه! ده كلام مظبوط بس ليه؟ فكّر في بقية العدد: ليه يسوع عايزنا نكون معاه؟

«.... لِيَنْظُرُوا مَجْدِي الَّذِي أَعْطَيْتَنِي، لِأَنَّكَ أَحْبَبْتَنِي قَبْلَ إِنْشَاءِ الْعَالَمِ.»

اللي يسوع عايزه في عيد الميلاد ده هو إننا نختبر الحاجة اللي إحنا أصلًا مخلوقين علشانها، اللي هي إننا نشوف ونستطعم مجده.

ياه لو الله يخلي الحقيقة دي تدخل بعمق في نفوسنا! يسوع خلقنا (يوحنا ١: ٣) علشان نشوف مجده.

قبل ما يروح للصليب على طول، كان بيتضرع قدام الآب علشان أعمق رغبة عنده: «أَيُّهَا الْآبُ أُرِيدُ (أريد) أَنَّ هَؤُلَاءِ ... يَكُونُونَ مَعِي حَيْثُ أَكُونُ أَنَا، لِيَنْظُرُوا مَجْدِي.»

أكتر حاجة أنا عايزها في عيد الميلاد السنة دي هي إني أشترك معاكم (ومع ناس كتير) في إننا نشوف المسيح في كل اكتماله (ملئه)، وإننا نبقى مع بعض قادرين نحب اللي إحنا شايفينه ده بمحبة أعظم بكتير من قدراتنا الإنسانية اللي نص نص. هو ده هدفنا من التأملات دي لموسم الاستعداد لعيد الميلاد. عايزين مع بعض إننا نشوف ونستمتع بيسوع اللي بنحتفل بمجيئه الأول، واللي بنشتاق لمجيئه الثاني.