فداء أبدي

لما بنقرا قصة الخروج في العهد القديم بنشوف قصة فداء عظيم حصل لشعب الله من العبودية بهدف الشركة مع الله. لكن كل القصة دي كانت بتشاور على فداء أعظم...

فداء يسوع المسيح لشعبه من عبودية الخطية والشيطان والموت.

هدف التأملات دي إنها توجه قلبك وفكرك وقت الاحتفال بعيد القيامة ناحية المخلص العظيم اللي جِه وضمن فداء أبدي لشعبه، وصلاتنا إن العيد ده يكون فرصة تشبع فيها بعمل "خروف الفصح" الكامل والنهائي اللي بموته وقيامته صنع "خروج" لشعبه وبسبب كده هم يقدروا يعيِّدو بفرح مالي قلوبهم ويشهدوا عن العمل ده بحياة تمجد المسيح .. 

كتبت التأملات دي وسجلناها بالعامية المصرية بهدف وصول الرسالة لعدد أكبر من الناس في بلادنا، وصلاتنا ليكم ولكنايسكم يكون عيد مجيد مليان بالتركيز على الفادي، اللي ليه وحده كل المجد.

** تابعوا التأملات بشكل يومي بدءًا من الاثنين 11 أبريل 2022

وسيط العهد

قد إيه مُعزي إن إستردادنا وتغييرنا مضمون، مش بسبب حاجة عملناها ولا هنعملها، لكن بسبب عمل المسيح لأجلنا. تمن التغيير والإسترداد ده، هو موت المسيح على الصليب، فالمسيح مماتش علشان بس يعرِض التغيير والخلاص على شعبه، لكنه في موته ضمن مصالحة وإسترداد شعبه بالكامل.

أنا باراباس!

كل اللي آمن بالمسيح أخد براءة، والمسيح هو اللي إتحاكم بداله! كل اللي آمنوا بالمسيح زي باراباس بالظبط، هُمَّ اللي كانوا يستاهلوا أبشع عقوبة.

لكن المسيح البار اللي مفيهوش ولا خطية هو اللي تحمّل العقوبة دي عنهم.

تاريخيّة القيامة

بصراحة لو القيامة ماحصلتش، يبقى كل كلام المسيح عن نفسه كان مجرد إدعاء كاذب،

لكن لو المسيح قام من الموت فعلاً، يبقى هو فعلًا الله الظاهر في الجسد، اللي جه وبذل نفسه على الصليب، علشان يفدي شعبه من خطاياهم.

هيرودس وبيلاطس

الحاجة اللي اجتمع عليها بيلاطس وهيرودس هي كراهية المسيح!

كل تفصيلة قاسية، كل إستهزاء وظلم وإفتراء إتحملِّه المسيح، كانت جزء من خطة الله علشان يخلّص شعبه من خطاياهم!

البار إتعامل معاملة الخطاة والأثمة علشان في يوم من الأيام الأثمة يتعاملوا معاملة الأبرار!

يسوع المسيح شفيعنا

فهمنا لحقيقة إن المسيح شفيعنا، هي دعوة ليك إنك ماتحاولش تدافع عن نفسك أو تقلل من خطيتك، إعترف بيها وخدها للشفيع اللي جالس في يمين عرش الله بيشفع فيك ويدافع عنك على أساس جراحه وموته لأجلك. في وقت يأسك وخوفك وفشلك من نفسك إجري عليه، على يسوع المسيح البار.

الصفحات

  • قرأت 2777 مرة